ميلك شيك فراولة

ليه فجأة كل الناس بقت شبهك؟ وليه كل الشوارع بقت بتفكرني بيك؟

الكلام والهزار وحتى الشغل والجد بحس بوجودك فيه، رغم انك مش موجود .. ولا عمرك عرفت تكون موجود من يوم ما وعدتني انك هتفضل دايمًا.

مدينة نصر وشوارعها الخمس حارات وبرضُه بتكون زحمة، بتفكرني بيك.

المعادي اللي كنت بتقول انها حتة برا مصر جوا مصر، كل مرة بمشي فيها بفتكرك وببتسم، وأرجع تاني أكمل طريقي، لوحدي.

الميلك شيك الفراولة بتاع ماكدونالدز بيرجعني لأول صورة لينا سوا، بس بطلت أشربه، بقول للناس ولنفسي إنه ماينفعش في الدايت، بس الحقيقة إنه ماينفعش من غيرك.

فطار ماكدونالدز اللي زي الكاوتش كنت بحبه بس عشان معاك، بس خلاص بطلت زي ما انت بطلت تحب كلامنا وهزارنا وتقولي اني اكتر حد بيفهمك، وانك لو خسرتني في يوم من الأيام هتكون غبي!

عارف مين اللي غبي فعلًا؟ أنا! عشان صدقت وعشان لحد النهاردة لسة بيكون جوايا أمل..

ازاي الأمل مامتش ومراحش؟ زي ما كل حاجة عمالة تموت وتروح؟

فاكر كتاب لماذا من حولك أغبياء وفاكر كل الروايات اللي ياما اديتهالك؟ فاكر الرسمة اللي وعدتني بيها؟ ماخدتهاش منك لحد دلوقتي، عشان من يومها عمرك ما وفيت بوعد.

فاكر خروجات داندي؟ وسعادتي عشان بس خارجين سوا حتى لو معانا ١٠٠ واحد؟ فاكر كوستا؟ والقهوة اللي شربتها هناك أول مرة معاك؟ كانت ساعتها ب١٢ جنيه، دلوقتي بقت ب ٣٠ جنيه، وبقت مُرة.

أحمد مكي عمل أغنية جديدة، لسة شبهك على فكرة، ماقدرتش أشوف الفيديو المرة دي، خفت أشوفك وأعيط في الشغل ويقولوا عليا تافهة بعيط على أغنية مكي.

أنا لسة بعدي على الشارع اللي قلت لي فيه انك بتحبني، بس مابقتش امشي فيه.

أنا لسة قلبي بيدق بسرعة لما بشوف اسمك او حتى تعملي لايك على بوست مالوش لازمة على لينكد إن، بس المرة دي من الخوف.

ازاي حد ممكن يكون مصدر أمان وفي لحظة يبقى مصدر وجع؟

إزاي لسة بفتكر كل الحاجات دي، وابتسم؟ وبعدين احس بوجع في قلبي من غير أي مبالغات؟

إزاي كل حاجة وعكسها؟

إزاي رغم كل دة، سبتني ومشيت من غير حتى ما تقول إنك ماشي؟

إزاي؟