No one ever apologized for making me that way

في quote مشهورة اوي للچوكر اللي هي "ليه اعتذر عشان بقيت monster؟ ومحدش عمره اعتذر انه خلاني كدة."

والحقيقة دي انسب جملة ممكن ابدأ بيها كلامي، يمكن اي موقف بيعدي علينا عشان يعدي بيغير فينا حاجات كتير يمكن للاحسن او للاوحش .. بس غالبًا محدش بيعلق غير على الوحش، ف بيبقى السؤال دايمًا: ايه الاسلوب دة؟ طريقتك اتغيرت .. وكلام من دة يعني، ومحدش بيفكر هو عمل ايه .. او سبب تغيرنا دة كان ايه، الا من رحم ربي يعني😂

الموضوع مؤلم جدًا عامًة، انك تشوف نفسك بتتغير للأسوء، انك تشوف نفسك جزء جواك بيتشوّه ومش عارف تعمل ايه .. محدش فينا بيختار يكون اسوء، ومحدش فينا بيعرف يحب نفسه بسهولة ويتعايش مع  اي تشوهات بتحصله، مع ان الكلمة صعبة، بس مفيش انسب منها .. تشوهات.

لما مثلًا انسان تكون طبيعته الحنية والاهتمام حتى لو مش دة اللي واضح يعني بس اهو دة اللي جواه .. ويحصله حاجة تخليه لوح تلج، ويتعلم معنى القسوة بحقيقي يعني مش مجرد قفش ولا نرفزة .. دة يبقى تشوّه، وهو اول واحد بيعاني منه، واول واحد بيبقى مش فاهم ازاي دة حصل، واول واحد بيلوم نفسه ان ساب حاجة تغيره .. بس الحقيقة المرة برضُه ان احنا مش دايمًا بنعرف نكون مسيطرين على حياتنا بشكل تام وحاسبين كل حاجة وواخدين بالنا.

والسؤال دايمًا هيفضل، ليه محدش عمرُه أعتذر انه خلاني monster؟ ليه محدش بيلوم اللي كان السبب؟