الحلقة الأخيرة؟

حياتي بالظبط زي مسلسل ١٥ حلقة، والمنتج والمخرج قرروا يخلوه ٥٠ حلقة.

كان مفروض يخلص من بدري، بس مكمل للأسف وممل ومافيهوش احداث ومجرد تكرار لحاجات بايخة ومشاعر عبثية وتفاصيل تافهة.

محدش متضرر غير البطل، اللي بيعيش ده مرتين، مرة في المسلسل ومرة في عيون الناس اللي دايمًا مستنين منه أكتر، ومستنين منه أحداث تانية .. وهو مش بإيده.

أنا حياتي مملة، مفيهاش أحداث ومفيهاش حكايات ومفيهاش مغامرات ومفيهاش حتة مشاعر مختلفة، حتى الوجع بيتكرر كل مرة بنفس التفاصيل  .. تخيل بتموت ١٠ مرات، كل مرة تموت بنفس الطريقة وتسلسل الأحداث وفي نفس المكان!

أقصى متعة بنسبالي، أفضل قاعدة لوحدي بتفرج على مسلسلات تافهة او فيها احداث انا عمر ي ما هعرف اعيشها .. لحد ما اتعب وانام من التعب.

أنا شخص عادي، عادي جدًا .. ولا عمري كنت شخص محوري ولا عرفت اكون مركز الكون، حتى من جوايا.

الناس من جواها دايمًا بتحس انها تستحق الاحسن، وانا من جوايا مش حاسة اني استحق حاجة أصلًا، ولا الأحسن ولا الأوحش.

أنا شخص مش أساسي، كل حاجة هتمشي عادي ومحدش هيحس بفرق لو وقفت مكاني وماتحركتش .. او حتى لو اختفيت.

أنا شخص مكرر، في مني كتير .. نجاحاتي تقليدية، انجازاتي مزيفة .. مواقفي كلها كليشيهات.

كل ما بيظهر طرف أحداث يكسر الملل، بيختفي .. بيبعد .. بياخد حتة مني ويوقف. 

مش بس البطل اللي فاشل، المؤلف كمان.

ممكن كفاية؟ ممكن نذيع الحلقة الأخيرة؟