Random #1

أول ما بنتعرف على حد جديد، بنكون منبهرين جدًا بالشخص دة وشايفين المميزات وبس .. معميين تماماً عن العيوب.

بنتخيل ان فكرة الزهق مش واردة وان كل يوم طول العمر هنفضل نتكلم طول الوقت وان الكلام عمره ما هيكون ممل ولا هيخلص.

بعد كدة بنفوق على صدمة ان خلاص الكلام بقى لُه أخر، الشخص دة فيه عيوب بتضايقنا عادي .. مش هنتكلم كل يوم طول العمر لأ. :D

بس للأسف في ناس بتترجم الموضوع دة على ان احنا بنبعد، او ان الشخص دة مابقاش يحبني زي الاول..

الموضوع عكس كدة تماماً، اول ما بنعرف بعض بنبقى بنكتشف بعض، بننبهر بكل تفصيلة وبيبقى عندنا كلام يكفي اسابيع يتقال :D

بعد كدة خلاص بنبدأ ندخل الكومفورت زون بتاعت بعض، ف الوحش بيبان زي ما الحلو بيبان وبنقرر نستحمل او نمشي على حسب مقدار حبنا واهتمامنا بالشخص دة، بنقدر ناخد جنب ونسكت من غير ما نخاف الشخص دة يفهمنا غلط.

كل ما الوقت بيعدي على علاقاتنا بنكتشف ان في طرق تانية للتعبير عن الحب والاهتمام غير الكلام ٢٤ ساعة، كل ما الوقت بيعدي بنعرف ان اللي بيحبنا فعلاً هو اللي شاف الحلو والوحش وقرر يفضل ويحب الوحش زي ما بيحب الحلو .. مش اللي شايف الحلو بس.

ف احنا مش بنبعد لأ، احنا بس بنتعلم نحب بعض بطريقة مختلفة، ومريحة.